Fundaziun Capauliana

La collecziun d’art privata probablamain la pli gronda dal Grischun

La Fundaziun Capauliana è in’anteriura collecziun privata. Ella è vegnida fundada il 1986 dals conjugals Duri Capaul e Clara Capaul-Hunkeler. Tuts dus èn sa deditgads durant lur entira vita a la creaziun da questa vasta collecziun d’ovras d’art e d’ovras istoric-culturalas dal Grischun. La collecziun cumplessiva consista da maletgs en ieli, aquarels, dissegns, stampats, placats, fotografias, chartas geograficas e cartas postalas e cumpiglia en total var 30’000 ovras. La collecziun è bain accessibla sur il catalog online e po vegnir utilisada per intents da retschertga, da publicaziun e dumondas d’emprest. Cun la Sala Capauliana ha la Fundaziun Capauliana creà en il Sennhof a Cuira ina localitad d’exposiziun permanenta e garantescha a la publicitad access a questa collecziun fitg impurtanta, betg mo per il Grischun. Cun trais exposiziuns curatadas ad onn, in program accumpagnant interdisciplinar attractiv e differents eveniments duai la Sala daventar in lieu d’inscunter ed in element central da la scena d’art e da cultura dal Grischun. En il focus stat la collavuraziun cun artist:as giuv:nas e curatur:as extern:as che sa fatschentan a moda multifara cun las ovras e fan uschia ina punt tranter la vasta collecziun e l’interpretaziun contemporana. Suenter l’exposiziun è avant l’exposiziun. La Sala resta mintgamai serrada durant ils temps d’installaziun e da demontascha. Resguardai per plaschair las datas d’exposiziun.

3 results