Institut dal Dicziunari Rumantsch Grischun

Editur dal pli grond vocabulari rumantsch

L’Institut dal Dicziunari Rumantsch Grischun (IDRG) rimna e documentescha a moda scientifica tut ils pleds e tut las locuziuns rumantschas. L’institut publitgescha il pli grond vocabulari rumantsch, il Dicziunari Rumantsch Grischun (DRG). Quel cuntegna l’entir stgazi da pleds da tut ils idioms e dialects rumantschs en il Grischun ed è in dals quatter vocabularis naziunals da la Svizra. La Societad Retorumantscha (SRR) è l’uniun purtadra da l’institut.

Suenter las emprimas lavurs fatgas da l’iniziant Robert von Planta (1864–1937) ha l’emprim redactur dal DRG, Florian Melcher (1875–1913), cumenzà sia lavur il december 1904. Cun agid da questiunaris han els collecziunà ensemen cun Chasper Pult (1869–1939) in ritg material linguistic, sin il qual la redacziun sa basa anc oz. La cartoteca maistra endrizzada dals fundaturs da l’institut ed amplifitgada d’in cuntin cuntegna passa dus milliuns attestaziuns dal rumantsch pledà e scrit. A partir dal 1939 cumparan ils artitgels tenor l’alfabet en fascichels en il format A4. A la fin da mintga tom sa chattan ils indices detagliads che han sco part centrala il cumpendi d’istorgia linguistica (suns, morfologia, sintaxa, furmaziun dals pleds, lexicologia, caracteristica e structuraziun dal rumantsch). Il DRG è era accessibel online.

Per sia lavur dispona l’IDRG d’ina biblioteca voluminusa e da pli che 30 000 fotografias. La biblioteca da consultaziun dal DRG tutga tar las collecziuns rumantschas las pli cumplessivas, cunzunt en quai che reguarda ils stampats vegls. Ultra da lingua e litteratura fan er istorgia, folcloristica ed onomastica part da l’inventari. L’IDRG ha ramassà da bell’entschatta fotografias illustrativas da l’entir Grischun e da la cultura alpina. Numerusas fotografias èn accessiblas en la Fototeca Fototeca Online.

5 Treffer