Wintersportmuseum Davos

Il museum da sport da naiv e da glatsch dal Grischun

Il Museum da sport d’enviern Tavau mussa a maun d’objects istorics il svilup dal sport da naiv e da glatsch dal cumenzament fin al preschent. Preschentads vegnan tant bobs e scarsolas da lavuratoris da Tavau sco era skis, patins, telecabinas e sutgeras veglias u maschinas da preparar pistas. En il museum vegn l’istorgia dal sport d’enviern colliada fermamain cun la midada da Tavau dal lieu da cura a la destinaziun turistica. Tematisadas vegnan innovaziuns impurtantas per Tavau, sco per exempel il Cup da Spengler che ha lieu dapi l’onn 1923 e ch’è il turnier da hockey sin glatsch internaziunal il pli vegl. La collecziun dal museum vegn enritgida cun pocals dal temp avant l’emprima guerra mundiala. Exponida è er ina trofea ch’è vegnida regalada da Sir Arthur Conan Doyle (1859-1930), l’inventader da la figura da roman Sherlock Holmes. Il Museum da sport d’enviern Tavau preschenta ina collecziun cumplessiva d’urdains da sport d’enviern da tut las disciplinas. Ultra da quai mussa ella objects d’infrastructura sco cabinas, sutgeras u maschinas da preparar pistas. Exponida è era vestgadira da sport istorica. En tut ils secturs documenteschan ils exponats l’istorgia ed il svilup dal sport d’enviern en connex cun Tavau.

4 Treffer