Nua ch'il temp sa cumprima – l'altar grond da la baselgia Son Calixtus a Brinzauls

Mintgatant passa il temp sveltezza e mintgatant enormamain plaun. En intgins lieus para il temp perfin da sa cumprimer. In tal lieu è la baselgia da Son Calixtus a Brinzauls. Qua vegnan gist tschintg tschientaners pli datiers.

Enturn il 1519 è la baselgia dad oz vegnida construida, pia anc avant l'entschatta da la refurmaziun en il Grischun ed anc avant ch'il Stadi da las Trais Lias survegnia sia constituziun. L'object da parada da la baselgia è l'altar grond gotic tardiv ch'è vegnì creà avant in mez millenni aposta per l'edifizi nov da la baselgia.

Ma uschè immovibel, festiv e quiet ch'il spazi da la baselgia para, uschè ferm sent'ins dentant adina puspè, che la baselgia e l'entir vitg da Brinzauls n'èn betg construids sin in fund ferm. Pervi da las plauncas ch'èn pli e pli en moviment, han ins dacurt stuì evacuar pliras giadas il vitg – inclusiv l'altar grond. I resta mo da sperar che Son Calixtus, il patrun da la baselgia, tegnia tuttina ses maun protegint sur il vitg, la baselgia e l'altar ...