In attest da militar – u tge che resta da la vita

«Nagut n'è tschert sin quest mund, auter che la mort e las impostas.» Quai ha scrit a ses temp il politicher Benjamin Franklin. Il citat pudess ins en il cas da Johann Wieland anc extender: cun scrittiras uffizialas. Da Johann Wieland, naschì a Schiers il 1812 e mort il 1866 en il reginavel dal zar russ, raquinta per exempel in attest militar.

En ina bella scrittira Kurrent notescha qua maior Hitzmann da la cumissiun da militar che Johann Wieland haja fatg servetsch da milissa per Schiers a partir dal 1831. En in'agiunta attestescha il medem maior a l'obligà da far servetsch da milissa "abilitad corporala", "bun cumportament" e "diligenza". Oz èsi inchapibel ch'ins pudeva da quel temp metter en servetsch in suppleant – ma precis quai è capità cun Johann Wieland.

Da la vita da Johann Wieland raquintan brevs da quel temp, sco l'attest militar conservà en la chasa da cultura Rosengarten a Grüsch. Johann Wieland è emigrà enturn il 1834 ed ha tranter auter tramess ina brev da Varsovia a ses "geniturs e fragliuns amads". Il 1866 è el mort en la Pologna d'ozendi. Che sias brevs èn insumma arrivadas a Schiers è remartgabel: "Schiersch" stat scrit sco lieu da destinaziun sin ina cuverta.