«Austras svabaisas» – ina delicatessa desiderada

Dies-chavriel? Brassà-bov? U tuttina pli gugent «austras svabaisas»? Quai èn simplamain lindornas bellas. E quellas han ins mangià gugent en il Grischun. En Surselva, a Sevgein, festivavan ins schizunt ina «pardanonza de schnecs»: la penultima dumengia avant Pasca suandava ad ina processiun solenna in past festiv cun la culminaziun culinarica: ina tratga cun lindornas.

Rimnar lindornas n’era dentant betg permess senz’auter, gia en il 16avel tschientaner existevan ordinaziuns latiers. Cur ch’ins dastgava rimnar, duvravan ins gugent pitschens zappins, numnads en retorumantsch tut tenor il lieu «zarclin», «cavaschneggs» u «sgrattaglimaias».

Las lindornas n’eran betg sulettamain ina tratga per ils indigens, ma er ina martganzia tschertgada. Quai cumprova per exempel ina brev da l’onn 1862, archivada en l’Archiv da cultura dal Partenz a Grüsch. In tschert Heinrich Schoch dad Oberhof scriva al commerziant Peter Hartmann da Malans e sa declera schizunt pront d’anticipar ils daners per la rimnada da lindornas durant la stad…