Avras ier ed oz – perditgas dal temp raquintan

Avras è ina da las 150 valladas dal Grischun. E sco mintga vallada en il Grischun, ha Avras sias atgnadads. Per exempel vala il vitget Giuf, che giascha sin 2126 m s. m., sco il pli aut vitg abità sur onn en l'entira Svizra ed in dals pli auts abitadis da l'Europa.

Ma co vivevan ins qua pli baud e co èsi da viver oz en la vallada? Per respunder questa dumonda è in expert da la val, l'anteriur politicher d'Avras Robert Heinz, sa mess a la tschertga da fastizs. En purtrets da video dumogna el da documentar las istorgias da la vita da las abitantas e dals abitants d'Avras en ina moda persunala, anecdotica ed a medem temp infurmativa.

Max Kohler per exempel, naschì ils 12 d'october 1939, raquinta en ses purtret da video da sia uffanza, dal far filistuccas, dal pigliar serps. Ida Bleuer-Klucker (1923-2028) prelegia ord in cumponiment davart las anteriuras tegias dals nursers en la Val Madris vischina. Ils videos èn da vesair en la Biblioteca chantunala grischuna, extracts datti era sin Porta Cultura.