Giugaret e test per la fantasia – la «Beinarchua»

Tge datti tut en ina buna chombra d'uffants? En il circul da Tavau natiralmain in «Popi». Quel survegn in «Lutsch», pia in lulli. Il «Popi» mett'ins natiralmain en ina «Wiega», e sche l'uffant duai emprender a chaminar, vegn quel en in «Ständal», in statariel.

Il linguist e scienzià da la cultura populara Valentin Bühler ha rimnà durant la segunda mesadad dal 19avel tschientaner ina massa davart il dialect gualser discurrì a Tavau. E sch'i va per ils uffants, n'emblida el natiralmain betg in auter giugaret popular: la «Beinarchua».

En auters lieus numn'ins quest giugaret era «Beinechue» u «Bainachue», il princip resta dentant adina il medem: ossa d'animals servan sco giugarets. Valentin Bühler ha descrit quai in pau pli bel: Ina «Beinarchue» saja ina «rundella dal schanugl dad ina vatga, savens colurada cotschen, brin, blau, verd, mellen, etc. che duai represchentar ina vatga. Quai dovra pulitamain fantasia.» Tgi che vul testar sia fantasia: «Bainachüe» datti en blers museums regiunals grischuns – e natiralmain er en il museum regiunal da Tavau.