La catastrofa e l'imperatur – davart in document dal 1464

Ils quatter tschientaners da las tschintg mastergnanzas: uschia pudess ins resumar curtamain l'istorgia da Cuira a partir dal 1464. E sche nus ans tegnain vi da questa versiun curta, stattan a l'entschatta da questa istorgia ina catastrofa ed in imperatur.

La catastrofa: la fin d'avrigl 1464 arda la citad da Cuira. Il grond incendi destruescha era la chasa municipala e tut ils vegls documents ch'ins tegneva en salv qua. Sin quai han quels da Cuira tramess lur scrivant tar l'imperatur a Vienna.

L'imperatur: Friedrich III dueva confermar als da Cuira ils vegls dretgs. Quai fa l'imperatur – e permetta a quels da Cuira era gist da fundar mastergnanzas. Las tschintg associaziuns da mastergnants (viticulturs, chalgers, cusunzs, fravis e pasterners) daventan silsuenter la pli impurtanta forza politica a Cuira.

Friedrich III fa dentant anc dapli, sco che mussa in document en l'archiv da la citad da Cuira. El porscha ina sort d'agid da reconstrucziun cun relaschar als da Cuira durant sis onns la mesadad dals tschains da funs e terren. L'autra mesadad dals tschains duain els utilisar per reconstruir la citad.