Ils chalzers da skis – in’invenziun grischuna?
Che Tavau ha giugà ina rolla impurtanta per il cumenzament ed il svilup dal turissem d’enviern en Svizra e sin plaun internaziunal sa prest mintgina e mintgin. Quest fatg però betg: A Tavau èn vegnids inventads avant prest 150 onns ils emprims chalzers da skis dal mund!
Enfin la fin dal 19avel tschientaner è Tavau stà enconuschent surtut sco lieu da cura per persunas malsaunas da tuberculosa. L’onn 1883 han ins dentant vis insatge nov sin las pistas dal Partenz: ils skis. Il medem onn ha in tschert Franz Heierling avert a Tavau in lavuratori da chalger. Questa casualitad è sa mussada sco ina bella coincidenza. En il decurs dals onns è Tavau sa profilà sco territori da skis ed il lavuratori da chalger Heierling ha cumenzà a far ils emprims chalzers da skis tut a maun. Quests chalzers solids e robusts han sveglià l’attenziun da skiunzs enconuschents internaziunalmain sco Walter Prager. Il success per propi han ils chalzers però gì pir als gieus olimpics d’enviern dal 1948 a San Murezzan, cura che blers sportists avevan en ils chalzers da Heierling.
Fin il 1965 èn ils chalzers vegnids fatgs a moda artisanala. Lura ha la fatschenta decis da metter sin il martgà ina segunda lingia da chalzers da skis producida en massa e pli bunmartgada per ina e scadin. En il decurs dals onns èn ils models ed ils materials vegnids sviluppads vinavant ed il 1983, precis in tschientaner suenter la fundaziun da la fabrica da chalzers Heierling, ha l’interpresa cuntanschì ses zenit cun ina producziun annuala da passa 100’000 pèra chalzers. Era sche la dira concurrenza sin fiera ha gì per consequenza che Salomon ha surpiglià la fatschenta Heierling ils onns 1990, n’è l’istorgia anc betg a fin. Oz maina Hans Martin Heierling, la quarta generaziun da la famiglia, al lieu d’origin dal lavuratori da chalger a Tavau in center per mesirar ed adattar chalzers da skis ed ha puspè cumenzà a producir chalzers da skis sin mesira. El ha damai revitalisà en quella moda la marca Heierling e cuntinuà cun ina tradiziun da passa 140 onns.