In chastè magic en la halla da gimnastica – in grond teater a Grüsch

Dal giarsun cusunz fin al derschader da pasch, dal chalger fin al burgamester: tuts han lur grond mument sin il palc a Grüsch. Qua gioga numnadamain l'uniun da teater Grüsch «Il chastè magic». E perquai ch'i sa tracta en quest toc d'in «teater da paraula cun chant en trais acts e sis maletgs», datti da vesair diversas ulteriuras persunas e figuras: elfas e nanins, in spiert da muntogna, ina nixa, perfin raunas e vampirs.

Il teater da paraula vegn annunzià a l'engronda la primavaira 1935, perfin las colliaziuns da tren da Tavau e da Cuira vegnan inditgadas. E cumpareglià cun oz è il teater da paraula en la halla da gimnastica da Grüsch in eveniment bunmartgà: Dus francs custan ils plazs ils pli chars.

Il toc, scrit da Theobald Masarey, è sco ch'i para stà in success. Gia il 1931 vegn el giugà, ed il 1952 era mussà pliras giadas, tenor ils documents originals en la chasa da cultura Rosengarten a Grüsch. Er en auters lieus han ins giugà gugent quest toc, a Grüsch hai dentant dà attracziuns supplementaras, almain il favrer 1952: ina «notg libra da saut» en la «Cruna» ed ina «prolungaziun da l'ura da polizia» en tut las ustarias da Grüsch.