In grond tgeiel empè da quadrins – in chau da zutger museal

Tgi che contempla bain in quadrin da zutger constatescha: era sche las varts dal quadrin èn rectangularas, n'èn ellas per il solit betg quadraticas. Ins stuess damai plitost discurrer da zutgers en rectanguls che da zutgers en quadrins. Saja sco ch'i veglia: en Svizra paisa in tal quadrin da zutger per il solit quatter grams.

Main enconuschent ch'il quadrin da zutger è oz il tgeiel da zutger. El è bler pli grond e grev – ed ha la furma d'in tgeiel u d'in chapè aut. Anc fin il 20avel tschientaner è il zutger vegnì vendì en questa moda tradiziunala. Co ch'in tal chapè da zutger vesa ora precisamain, mussa il Museum La Truaisch a Sedrun. Il museum conserva in vegl tgeiel da zutger da la firma Béghin a Thumeries en la Frantscha dal Nord.

Ma co survegniva il zutger sia furma da tgeiel? Fitg simpel: la massa da zutger chauda vegniva emplenida en ina furma da cular, sa cristallisava e sa distatgava silsuenter da la furma radundetta. Il tgeiel u chapè stuev'ins mo pli derscher or da la furma, emballar e trametter. Per exempel en il Grischun. Cun questa cuntrada muntagnarda gieva el era fitg bain a prà: in chapè da zutger è bunamain uschè dir sco granit – e sia furma regorda ultra da quai ad in spitg da muntogna.