Tradiziun cotschna – il costum engiadinais

«Jede wahre Engadinerin sollte nicht anders als in der roten Tracht zum Traualtar treten, und keine echte Oberländerin sollte anders als mit der zierlichen ‚Schlappa‘ und mit dem schönen Seidentuch zum grossen St. Plazidusfest nach Disentis gehen wollen.»

Quai che stat scrit en il «Bündnerischen Haushaltungs- und Familienbuch» da l'onn 1928 na scrivess ins oz strusch pli uschia. Ils costums na tutgan betg pli per tut pretsch davant l'altar, ma els fan part dal bain cultural da la Svizra. Tschients differents costums datti en l'entira Svizra. La pli gronda differenza exista probablamain tranter il costum da dumengias e quel da lavurdis.

La diversitad da costums è natiralmain era visibla en il Grischun. Qua èn ils costums colliads fermamain cun las festas. Gia a la Festa da la Chalavaina il 1899 – per commemorar la Battaglia a la Chalavaina l'onn 1499 – han ins documentà ils costums cun maletgs en in cudesch. E sa chapescha è er il costum engiadinais en quest cudesch – sco quai ch'ins vesa oz en il Museum d'Engiadina Bassa a Scuol – gia cotschen.