Adattà per ils culms grischuns e per il Butan – il criec da Schnaus

Quel che metteva pli baud cunfins na fascheva quai per il solit betg cun la lingera sin la charta geografica, mabain a maun da cundiziuns natiralas: Uschia furma per exempel in aual il cunfin tranter la vischnanca da Schnaus e Rueun en la vischinanza da Glion. Per Arnold Giger n’è quest cunfin stà nagin obstachel. L’onn 1877 ha el construì da la vart da Schnaus in lavuratori, ma la roda ed il conduct d’aua n’ha el betg dastgà bajegiar là. Consequentamain ha el installà la propulsiun per sias maschinas 75 meters plinenvi che ses lavuratori – da l’autra vart da l’aual da cunfin, sin il terren da Rueun.

Arnold Giger ha anc gì autras bunas ideas: El ha inventà l’uschenumnà criec da Schnaus che ha simplifitgà considerablamain la vita dals purs da muntogna. Il criec tagliava e vulveva il terren en ina giada ed era cun sia colliaziun da fier e lain bler pli resistent che araders convenziunals fabritgads dal tuttafatg da lain.

L’onn 1908 han ils figls da Giger surpiglià il lavuratori ed han sviluppà vinavant l’arader. En tut han els fabritgà var 3000 criecs da Schnaus. Suenter la Segunda Guerra mundiala è la producziun sa reducida, gist sco la cultivaziun dad ers ch’era anc ina giada prosperada durant ils onns da guerra en la gronda «battaglia dals ers». Il lavuratori dals frars Giger exista anc adina. E forsa èn intgins criecs da Schnaus en funcziun anc oz: Fin ils onns 1970 èn els vegnids exportads schizunt en Bolivia ed en il Reginavel dal Butan.