L'art da sa regurdar – ina crusch da fossa dal Museum local da Schmitten
«Quai che nus essan vegnis vus a daventar. / Quai che vus essas, quai essan nus stads.»
Uschia statti scrit en l'ossari da la baselgia da Son Peder a Mistail situada en in lieu pittoresc damanaivel da Casti. Ils oss e las chavazzas èn emplunads qua accuratamain. Ils pleds davantvart paran sco in «memento mori»; els fan endament che la vita sin terra na dura betg semper. L'admoniziun impressiunescha surtut era pervi dal lieu particular: la baselgia carolingica è per uschè da dir la pitschna sora da la baselgia da Son Jon a Müstair. La finala fa la claustra da Müstair part dal patrimoni mundial da l'UNESCO.
Pli lunsch viaden en la Val d'Alvra, en il Museum local da Schmitten, sa chatta ina crusch battida a maun ch'era medemamain in segn da regurdientscha. Ella na dueva dentant betg regurdar a la mortalitad dals umans en general, mabain ad ina tscherta persuna morta. Enconuschent n'è dentant nagut da quella persuna. Il num è vegnì allontantà, restada è la bellezza da la crusch battida cun grond inschign artistic.
Talas cruschs han tradiziun en la regiun. A Lantsch, lunsch sur la baselgia da Mistail, sa chatta la baselgia da S. Maria. En ses santeri datti sulettamain cruschs sco quella en il Museum local da Schmitten. Naginas da questas cruschs n'èn da fier culà, naginas da crap, tuttas èn battidas a maun – saja quai en il stil da la gotica, da la renaschientscha u dal baroc.