Terza u emprima classa? Il cudesch d'exempels da la Retica dat scleriment

«Allegra, ils bigliets per plaschair!»: uschia u sumegliant tuni en ils vaguns da la Viafier retica (VR), cura che la conductura u il conductur vul controllar ils bigliets. Oz prendan ils blers ils telefonins or da la tastga per mussar ils bigliets digitals. Ma co savevan ins pli baud, sch'in bigliet era valaivel? La finala na deva quai gea betg mo bigliets per l'emprima u segunda classa, ma era per la terza. Vitiers vegnivan bigliets per viadis da la dumengia u bigliets per persunas che prestavan servetsch militar e funcziunaris.

Scleriment ha dà tranter ils onns 1895 e 1965 in uschenumnà cudesch da bigliets d'exempel. Quel serviva sco documentaziun e per scolar il persunal. Blers trens na deva quai bain anc betg enturn l'onn 1895: la rait da la viafier cumpigliava da quel temp mo ils trajects da Landquart a Tavau e da Landquart sur Cuira a Tusaun. Il 1914 era la rait dentant prest uschè gronda sco oz; ella cumpiglia stgars 400 kilometers. Ils ultims onns è sulettamain la lingia dal Vereina vegnida vitiers.

Il vegl cudesch d'exempels bain restaurà vegn conservà oz en il Museum da viafier Alvra a Bravuogn. E tgi che na sa betg co ch'ins produciva pli baud ils bigliets da chartun brins: il Museum da viafier Alvra mussa en ses deposit public ina maschina da stampar bigliets ch'ins ha duvrà durant passa in tschientaner.