Tailas per la vita – ils cudeschs da campiuns da la firma Pozzy

Ina butia da vestgadira e d’artitgels da papetaria? Probablamain na supponiss nagin che ina giada tutgava er ina banca tar ina tala butia – latiers er anc ina da las pli veglias bancas da la Svizra. Precis quai è dentant stà il cas a Poschiavo. La firma da la famiglia Pozzy e la banca correspundenta èn vegnidas fundadas enturn l’onn 1747. L’UBS ha surpiglià dal 1972 la banca – la pli veglia da las bundant 370 bancas integradas en l’UBS fin alura.

E la butia? Magiels, buttiglias e butschins da la chasa da commerzi e negozi Pozzy-Semadeni sa chattan oz en in center per mantegnair l’ierta culturala che vegn gestiunà dals museums dal Puschlav. Qua è conservà bler da quai che vegniva vendì en il negozi e ch’ins duvrava per viver en la Val Puschlav. I dat schizunt ina buttiglietta cun elixir da vita fatg sez.

Mantegnids èn era dus gronds cudeschs da campiuns cun tschients da musters da taila. Tar ils tocs stoffa tutgava mintgamai in numer da catalog e l’indicaziun dal pretsch per meter current. Ins chatta quasi tut – da stoffas cun quaders pitschens fin a taila da pliras colurs – ed er anc or da differents materials so mangola, saida u materials sintetics.