«Cuntrada sper Tavau-Wolfgang» Philipp Bauknecht – l'artist emblidà da l'expressiunissem a Tavau

En ina cuntrada muntagnarda en tuns mellens e verds glischants s'extendan las chasas da Tavau-Wolfgang a moda idillica davant il lai blau.

L'aquarel da Philipp Bauknecht (1884-1933) mussa il lieu, en il qual l'artist è viagià il 1910 pervi da sia malsogna da tuberculosa. L'artist tudestg da 26 onns, che aveva frequentà suenter ses emprendissadi da scrinari la scola d'artisanadi roiala a Stuttgart, è sa chasà en il vitg alpin ed è mitschà là sco pacifist dals cumbats da l'Emprima Guerra mundiala. La vischnanca muntagnarda grischuna cun sia natira ed ils purs e giasts da cura ha el documentà en maletgs en ieli, entagls en lain ed aquarels. Ma malgrà ch'el ha stgaffì ina gronda quantitad da squitschs en format grond e maletgs monumentals cun colurs intensivas ed illustraziuns expressiunisticas, n'è il num Philipp Bauknecht ozendi betg uschè enconuschent sco Max Pechstein, Emil Nolde u Ernst Ludwig Kirchner.

Philipp Bauknecht è vegnì adina pli malsaun durant ils onns 1920 ed è lura mort il 1933 durant in'operaziun a Tavau. Malgrà ch'igl ha dà exposiziuns da sias ovras anc durant sia vita, en spezial tranter il 1920 ed il 1930 en Germania, è il pictur e graficher ì en emblidanza. Durant il temp dal naziunalsocialissem valevan sias ovras sco «art degenerà», vegnivan confiscadas, destruidas u èn idas a perder.

Ina part da sias ovras na sa chattava da quel temp dentant betg en collecziuns en Germania, mabain era zuppada e segira en il possess da sia vaiva Ada van Blommenstein en ina citad pitschna en ils Pajais Bass. Pir il 1960 ha il commerziant d'art e gallarist neerlandais Joop Smid rescuvert sias ovras e mussà quellas dapi lura en exposiziuns e publicaziuns.