Il coiffeur sco medi? In vegl document d'emprendissadi da Tusaun

Undraivel e modest duai el esser stà, il giuven Lucas Culono. Trais onns a la lunga, fin il 1601, ha el sa laschà introducir da Lucius Papa cun blera pazienza en l'art da «Barbierer, Leib- und Wundtartzney». Ditg in pau a moda saloppa: Lucas Culono ha fatg in'emprendissadi da trais onns sco coiffeur e medi enina – e quai tar Lucius Papa, domicilià a Tusaun.

E danunder era Lucas Culono? Tenor il document dal 1601 derivava Lucas Culono «von der Brugg uss dem Engadin». Cun quai era probablamain manegià La Punt, ina part da la vischnanca odierna da La Punt Chamues-ch.

Nua ch'il giuven barbier e medi è la finala ì a star, è nunenconuschent. I resta da sperar che las recumandaziuns da Lucius Papa al hajan gidà en sia vita. Ludà ha il maister d'emprendissadi ses scolar tut a dubel. En il document d'emprendissadi, oz en possess da l'archiv cultural da Tusaun-Viamala, hai num: «Ehrlich, redlich, uffrichtig, wohl und unkhlagbar» saja Lucas Culono sa cumportà durant l'emprendissadi, uschia ch'ins na possia dir nagut dal mal dad el ed i restia mo d'al giavischar «alle Ehr und Guots».