Rumper glatsch e crear art – in entagl en lain da Giovanni Giacometti

Co tegnevan ins frestg il latg, co frestgentavan ins la gervosa cura ch'i na deva anc naginas frestgeras? Cun glatsch or dal lai da Tavau per exempel. Bun in milliun kilos glatsch han ins rut or dal lai da Tavau schelà, sulet durant l'onn 1899. 1000 chargias en vaguns da tren han chattà lur via en la Bassa e fin en la Frantscha. E natiralmain han ins er extratg il glatsch or dals lais da l'Engiadina.

Co che la lavur dal rumper glatsch vegniva fatga, mussa tranter auter il Museum d'art dal Grischun – e quai cun in'ovra da Giovanni Giacometti (1868-1933).

L'ovra na mussa betg las colurs glischantas che marcheschan uschiglio ils maletgs da Giacometti cun motivs da l'Engiadina u da la Bregaglia. L'entagl en lain impressiunescha plitost cun ses ferms cuntrasts. E tgi che guarda precis, vesa quant fin che l'artist ha procedì. Quai è era da vesair tar il bloc da stampar che tutga er a la collecziun dal Museum d'art dal Grischun.