L’Engiadina Bassa cun tut sias fassettas – la famiglia da fotografs Feuerstein

Da la ciclama europeica fin a la pantofla da Nossadunna, da la muntanella fin al girun da mieurs, da la racolta da tartuffels fin a la meztga da pors, da la tura da skis fin al cortegi da chatschadurs: La famiglia da fotografs Feuerstein da Scuol ha purtretà durant quasi tut il 20avel tschientaner l’Engiadina Bassa cun tut sias fassettas. L’ovra dals quatter fotografs Feuerstein cumpiglia temas sco la lavur a chasa ed isanzas, il turissem u la flora e fauna.

Il crap da fundament ha tschentà Johann Feuerstein il 1898 cun endrizzar in atelier da fotografia a Scuol. Ses figl Domenic Feuerstein è sa deditgà a la fotografia da la natira, ha però era fatg fotos per il turissem. Jon e Mic Feuerstein, ils biadis da Johann Feuerstein, han cuntinuà cun la lavur da bab e tat risguardond fenomens novs sco la construcziun d’ovras electricas en l’Engiadina Bassa.

Gist uschè renumads sco Albert Steiner, che ha vivì ina gronda part da sia vita a San Murezzan e che ha marcà cun sias fotografias il maletg da l’Engiadin’Ota, n’èn ils Feuersteins betg. E tuttina resorta lur ovra cumpletta pervia dad almain trais caracteristicas: cuntinuitad, qualitad e multifariadad.