Pronta per sa defender e tuttina bain accessibla: la fortezza Neu-Aspermont

Tgi che concepescha ina chasa planisescha normalmain in’entrada al plaunterren. Auter è quai stà en il cas da la fortezza Neu-Aspermont sur Jenins. Qua è sa furmada a l’entschatta dal 13avel tschientaner ina tur pumpusa cun quatter plauns. Entrar en questa tur na pudev’ins dentant betg al plaunterren, mabain mo tras in’uschenumnada entrada auta che manava en il terz plaun.

La raschun è clera: la construcziun dueva esser pronta per sa defender. E quest caracter da defensiun han ins tgirà vinavant: la tur è vegnida auzada pliras giadas. Plinavant han ins agiuntà duas parts a quest edifizi. Il segund tract ha per part schizunt mirs da fin a 2,5 meters ladezza.

La moda da construir fitg massiva e las ulteriuras fortificaziuns n’han dentant betg pudì impedir che l’anteriura sedia dals Signurs d’Aspermont ha cumenzà a sballunar. Gia dapi la fin dal 17avel tschientaner è la fortezza numnadamain bandunada. Il Servetsch archeologic dal Grischun ha dacurt tuttina pudì examinar la construcziun. Plinavant han ins segirà quella e danovamain fatg accessibla ella – cun agid da stgalas filigranas che mainan sco in bindel tras la construcziun e sia istorgia.