Sgols grischuns en grondas autezzas – fotografias dal Grischun or da l'aria

La plazza aviatica da Samedan? Cler, quella enconusch'ins. Aviuns partevan ed atterravan dentant er en tut auters lieus dal Grischun: sin lais schelads, prads verds – e mintgatant er en in clavà. Il piunier aviatic enconuschent Walter Mittelholzer ha per exempel fatg l'onn 1928 a Tavau in tal atterrament accidental. D'ina gasetta satirica ha el perquai survegnì il surnum «Mittendurchsholzer».

E tuttina: Walter Mittelholzer vegn celebrà er a Tavau sco piunier aviatic. El ha dà a la Svizra ses maletg or da l'aria. Il 1919 ha el fundà ensemen cun ses pilot-instructur Alfred Comet l'emprima societad aviatica svizra, la «Ad Astra Aero». Ina pitga da la fatschenta èn stads ils transports da passagiers, l'autra las fotografias or da l'aria.

Maletgs da la Svizra sco quels da Mittelholzer e da ses contemporans sgulants n'avevan ins fin quel di anc betg vesì. Muntognas, vitgs, flums – a vista d'utschè ves'ins tut a moda detagliada. Fin oz èn tals maletgs or da l'aria impurtants, per exempel per la mesiraziun dal terren. Tgi che vul vesair il Grischun or da l'aria na sto dentant betg exnum prender l'aviun. L'Archiv dal stadi dal chantun Grischun ha digitalisà diversas fotografias or da l'aria ch'èn accessiblas era sin Porta Cultura.