In capricorn cun barba da chaura? – Il cas spezial da «Fridolin»

Il capricorn è circundà d’istorgias stranas. Sco animal da vopna cumpara el gia avant circa 800 onns en il Grischun actual, ma gnanca 400 onns pli tard, enturn il 1650, è il capricorn svanì. Sia mancanza da timiditad e l’effect curativ presumtiv da preparats da capricorn han gì consequenzas fatalas.

Bundant 200 onns pli tard han ins empruvà pliras giadas da colonisar puspè quest animal enSvizra, tranter auter era cun ibrids da capricorns e chauras da chasa. Ma pir la cuntrabanda da capricorns or dal reginavel d’Italia a l’entschatta dal 20avel tschientaner ha mussà emprims success.

Oz vivan en il Grischun bundant 7000 bucs-capricorn e chauras-capricorn. Betg pli en veta è Fridolin, in ibrid da capricorn e chaura da chasa. L’animal naschì dal 1983 en la Val Calanca ha la fin finala cuntanschì ina vegliadetgna dad indesch onns. Il Museum da la natira dal Grischun ha pajà per il mantegniment da l’animal. Oz sa chatta Fridolin sco preparat en il Museum da la natira dla Grischun – cun barba da chaura e cornas da capricorn.