Ina fabrica da bischus medievala? – Reflexiuns davart ina furma da cular da Cuira

Producziuns da massa valan per ordinari sco fenomen da l'industrialisaziun e dal temp modern. Ma gist uschè simpel n'èsi tuttina betg. Quai mussa per exempel ina platta da crap ch'il Servetsch archeologic dal Grischun ha chattà durant exchavaziuns sin l'areal dal Sennhof a Cuira.

La platta da crap cun divers motivs è vegnida utilisada avant bundant 1000 onns sco furma per cular bischus ed objects religius. Cun agid da quella pudev'ins crear penderliezs en furma da crusch, fivlas a rudella, anels u rintgas sco er auters penderliezs u applicaziuns – e quai en seria. La platta era utilisabla da tuttas duas varts.

Quai na vul dentant betg dir ch'i deva ina sort da fabrica da bischus e da devoziunalias dal temp medieval sin l'areal dal Sennhof. Ma speziala è la platta en mintga cas. Ella unescha la bellezza da l'artisanadi cun ina tecnica da producziun raffinada.