Ina «spezialitad» zoologica – la glimaja da grip engiadinaisa

La turta da nuschs engiadinaisa? Questa spezialitad da pasta gruglia emplenida cun nuschs enconusch’ins en l’entira Svizra. Tge è dentant ina glimaja da grip engiadinaisa? Er ina spezialitad culinarica?

Betg propi. Bain vegnivan glimajas sur tschientaners sin ils plats en il Grischun, ma la glimaja da grip engiadinaisa n’è betg propi d’impurtanza culinarica, mabain zoologica – e quai betg l’ultim pervi da sia raritad. Il num fa gia allusiun: la glimaja da grip engiadinaisa datti cunzunt en l’Engiadina. Derasada è la glimaja insumma mo tranter Landeck e San Murezzan sco er en il Puschlav ed en la Valtellina.

Sia particularitad? Igl è fitg grev da distinguer la «Chilostoma achates rhaeticum», sco la sutspezia da la glimaja da grip d’achat vegn numnada, dad autras glimajas da grip. Ins chatta ella – sco il num tradescha era qua puspè – per il solit sin grippa e glera. E natiralmain datti da vesair las crosas da la «spezialitad engiadinaisa» zoologica er en la collecziun dal Museum da la natira dal Grischun a Cuira.