Dal puck fin a la chapellina – il HCD en il museum da sport d’enviern a Tavau

Numerusas contessas e poetas e nundumbraivels baruns, scrivents e musicists èn stads durant la fin dal 19avel e l’entschatta dal 20avel tschientaner a far cura si Tavau. Il clima alpin ensemen cun tractaments medicinals dueva medegiar la tuberculosa. Questa malsogna infectusa è sa derasada a moda epidemica durant ils onns 1890. Millis persunas murivan mintg’onn sulet en Svizra pervia da la tuberculosa.

Sch’ins pensa a quest fatg, èsi prest curius che Tavau è sa sviluppà ad ina destinaziun da sport d’enviern. Ma blers giasts da cura na faschevan betg simplamain nagut. Scarsolar era en moda, patinar ed ir cun skis èn svelt s’etablids – e 1918 è naschì l’emprim club da hockey a Tavau.

Il club dad oz, il Club da Hockey da Tavau (HCD) fundà il 1921, na ston ins betg pli preschentar: cun 31 titels è il HCD la finala il campiun svizzer da record. Infurmaziuns fundadas ed objects spezials da sia lunga istorgia mussa dentant il museum da sport d’enviern a Tavau. E sa chapescha chatt’ins qua er istorgias e raritads dad autras disciplinas dal sport d’enviern.