Cura che Scuol è fieu e flomma – l'Hom Strom
La vischnanca da Scuol è renumada per sia aua minerala. En il conturn da la chapitala da l'Engiadina Bassa sburflan passa ventg funtaunas mineralas or dal terren. L'aua stimulanta spisgenta il bogn mineral local sco era diversas funtaunas dal vitg. Ma ina giada l'onn na vai a Scuol betg per l'aua, mabain per in auter element: il fieu.
L'emprima sonda dal favrer sa radunan ils uffants da scola da Scuol ed enfaschan in bastun dad otg meters cun strom-seghel enfin ch'els han in «Hom Strom» davant els. Quest Hom Strom vegn suenter tschentà sin in prà davant il vitg. La saira sa raduna la populaziun enturn questa figura che vegn uss arsa. Enturn ed enturn vegnan fatg sgulatschar cullas da fieu, uschenumnadas «bombas» e tuts chantan la chanzun tradiziunala da l'Hom Strom.
L'origin da l'usit da fieu n'è betg enconuschent. Mintgatant vegn cumpareglià l'Hom Strom cun il Böög che vegn ars al Sechseläuten a Turitg. Mintgatant vegn el era cumpareglià cun il Burning Man che vegn ars al festival da musica a Nevada. Plitost datti dentant in connex cun il firà catolic da Nossadunna da chandailas che ha lieu l'entschatta da favrer. Lura glischa era puspè il sulegl sin la plazza dal vitg da Scuol che giascha durant l'enviern en la sumbriva dal Piz San Jon marcant.