«I HAVE A DREAM» – art urban che animescha da siemiar

Tschintg tozzels dies da cudeschs, mintgin uschè grond u pli grond ch’in uman, embelleschan la paraid externa da la chasa da scola Lachen a Cuira. Or d’in cudesch avert che glischa s’auzan ad aut bustabs clers splendurants ed in tarment utschè. Tranter sias alas sesa in uffant. La scena para sco or d’ina paraula, in’istorgia, in siemi.

«I have a dream»: Uschia ha formulà gia il 1963 Martin Luther King sia speranza per in meglier avegnir, egualitad e libertad. Era la chanzun da la band da pop svedaisa ABBA ch’è cumparida passa quindesch onns pli tard e che porta il medem titel intermediescha cun la formulaziun che sa repeta adina puspè la speranza ed il desideri per in bun avegnir e la forza dals agens siemis. En la chanzun ha la band dà ina vusch ad in chor da scolaras e scolars che accumpogna la chanzun.

Era l’ovra artistica da l’artist Fabian Florin «BANE» ch’è naschì il 1982 a Cuira stat en relaziun cun l’uffanza. BANE è creschì si en il conturn direct da la chasa da scola Lachen ed ha pudì regalar cun sia ovra dal 2015 als uffants en sia citad natala in grond maletg giagl e plain fantasia che animescha d’avair gronds siemis e ch’irradiescha la speranza sin in mund plain schanzas, en il qual ils uffants pon explotar lur entir potenzial e viver lur agens siemis.

Guardai ina giada pli precis sin ils dies dals cudeschs, els mussan tge che l’artist collia cun uffanza, patria e la citad da Cuira.