Ina bugliotta speziala – il stgaudaureglias da Rüsch

Bugliottas datti en bleras differentas variantas: da materia sintetica u cautschuc, cun surtratgas da launa u pail. Pli baud mettevan ins perfin crappa stgaudada sur il fieu sin venters dolurus.

Pli pauc enconuschentas èn bugliottas per ureglias fraidas u inflammadas. En il museum local a Schmitten en la Val d'Alvra datti in tal exemplar da l'entschatta dal 20avel tschientaner. Il stgaudaureglias consista d'in uder da gumma cun ina serradira da struvegiar ed anzas. L'uder pon ins emplenir cun aua chauda, las anzas procuran per il confort durant purtar el: il stgaudaureglias pon ins numnadamain fermar cun agid da las anzas, tut tenor vi dal chau, la chapitscha u il chapè.

È quest stgaudaureglias uss in'invenziun tipica dal Grischun? La finala survegn'ins svelt ureglias fraidas en la muntogna. Na, in bul tradescha quai. Il stgaudaureglias è vegnì producì da la firma Rüsch – e quella sa chattava da quel temp datiers da Stuttgart. La fabrica era spezialisada sin products da gumma lom ed instruments chirurgics elastics. Tgi che ha pia duvrà be in stgaudaureglias da Rüsch ha pudì esser cuntent: auters products da Rüsch eran numnadamain cateters e bischens da beglia.