Ina lavur canerusa – il taisser a maun

Co fissi cun ina «aventüra gronda»? U vuless insatgi pli gugent seser sin ina «grusaida»?

Sch’ins guarda enturn en la tessaria a maun Tessanda a Sta. Maria percorsch’ins svelt: il rumantsch – respectivamain il jauer – è omnipreschent qua. E quai che vala per la lingua, vala era per il taisser a maun: tecnicas tradiziunalas sco il pitg da crusch grischun chatt’ins qua medemamain sco designs novs e raffinads. Da quai dat per exempel perditga ina tastgetta da tualetta per grondas aventuras u ils plimatschs da seser pratics.

Ma tge è la Tessanda precis e tge è insumma ina tessaria a maun? Per l’ina in lieu canerus. A Sta. Maria aud’ins dapi bundant 90 onns a clapragnar ils talers. Per il mument sesan fin 20 dunnas davos ils fils da launa, saida u glin nunelavurà – ma cun seser n’è la lavur pretensiusa natiralmain betg fatga. L’emprim sto il taler vegnir endrizzà cun millis fils. Malgrà las sfidas u forsa gist pervia da quellas: En l’entir Grischun è il taisser a maun anc preschent. Actualmain pratitgeschan almain 60 persunas questa tradiziun.