Naiv daventa art – ils «snowballs» da Not Vital

Sto art vesair ora sco in maletg d'ieli classicistic da l'artista Angelika Kauffmann ch'è naschida a Cuira? Dovri scenas istoricas, dissegnadas bel e fin cun ieli sin ina taila? U po er ina culla da vaider esser art? Ella po – almain en il cas dals «snowballs» da Not Vital.

700 cullas da vaider ha l'artist, ch'è naschì il 1948 en l'Engiadina, stgaffì – e quai en collavuraziun cun ils suflavaider renumads da Murano, in'insla davant Venezia. Concernent la tecnica èn ils «snowballs», ch'èn da temp en temp part da la collecziun dal Museum d'art dal Grischun a Cuira, pia senz'auter art. E Not Vital ha scuvert gia sco uffant che art po esser dapli ch'in maletg en ieli. Max Huggler, il directur da la halla d'art a Berna da quel temp, aveva mussà al buob da 12 onns ovras d'art en sia chasa en l'Engiadina Bassa. Tranter quellas er in'ovra da Kurt Schwitters, ina cumposiziun d'objects dal mintgadi. Il giuven Not Vital era stà impressiunà.

Ed uschia sa fatschenta era Not Vital oz cun il mintgadi ed il svanaivel; ed emprova da mantegnair ina resursa grischuna impurtanta en il temp da la midada dal clima en ina furma artistica.

En la collecziun dal Museum d'art dal Grischun pon ins natiralmain contemplar ovras dad omadus, dad Angelika Kauffmann (1741-1807) e da Not Vital, sco era da bleras autras artistas ed artists.