In corvagl en il Museum Alpin – la spezia n'è tuttina betg svanida dal tut

Ditg han ils corvagls accumpagnà l’uman sco animals che suondan la cultura. En il conturn da l’agricultura umana han els chattà lur nischa ecologica. Plazzas da cuar han ins per exempel chattà tar il chastè da Tarasp e vi da la ruina Rezia Ampla. Ma lura è l’utschè svanì da las Alps Orientalas. Dapi ca. il 1967 na san ins da naginas cuadas pli en il Grischun.

Ma tge ha manà a la spariziun da questa spezia? Quai na pon ins betg pli reconstruir cun segirtad, ma i dat en egl ch’ils corvagls èn sparids il temp ch’ins ha successivamain chalà da cultivar granezza e verdura en il territori alpin. Per chattar pavel è il corvagl dependent cunzunt da surfatschas cun pastg curt u surfatschas magras, nua ch’el tschertga cun ses bec insects e baus – pia surfatschas sco funs betg cultivads u vieuts.

Pers n’è il corvagl dentant betg en il Grischun. In preparat d’in corvagl engiadinais or da la collecziun da Gian Saratz (1821-1900) chatt’ins en il Museum Alpin a Puntraschigna. Là preschenta el sco perditga dal temp silenziusa las midadas culturalas en noss chantun muntagnard.

En collavuraziun cun l’Uffizi da chatscha e pestga dal Grischun