In maletg dal mintgadi cun valur da raritad – Bruno Giacometti sin ina fotografia dal 1912

In uffant en unifurma militara. En in maun tegna el ina bandiera, en l’auter in’arma da termagls. Talas fotografias datti en blers albums da fotografias. Er il Centro Giacometti a Stampa tegna en salv in tal maletg. Dentant ha quest maletg ina valur da raritad: da vesair sin la fotografia dal 1912 è numnadamain il giuven Bruno Giacometti – e quai en in’unifurma d’in colonel da l’artigliaria svizzer.

L’unifurma è stada in regal da Ferdinand Hodler. L’artist era da quel temp enconuschent en l’entira Svizra: l’ovra da Hodler «Der Holzfäller» ha ornà dapi il 1911 la bancnota da 50 francs, «Der Mäher» la bancnota da 100. E natiralmain enconuschev’ins Hodler er a Stampa: il grond artist era in ami dal bab da Bruno, Giovanni Giacometti – ed el era il padrin da Bruno Giacometti.

L’art para Bruno Giacometti (1907-2012) d’avair gì en il sang. Dentant ha Bruno Giacometti vulì far insatge «nizzaivel» ed è daventà architect. Tranter auter ha el concepì la sedia dal Museum da la natira dal Grischun a Cuira. Sia entira vita è el dentant restà attaschà a l’art – uschia ha el tgirà ils relaschs da ses bab, Giovanni Giacometti (1868 -1933), e da ses frar, Alberto Giacometti (1901-1966).