Ina bugliotta sco apparat multifuncziunal museal

Vus stampais, copiais e scannais u vus maschadais, cuschinais e cuiais en il furn. Apparats multifuncziunals datti per exempel en cuschina u per il biro. Ma effectivamain devi apparats multifuncziunals gia ditg avant la digitalisaziun u l'electrificaziun. En il museum regiunal da Tavau chatt'ins ina bugliotta da zin cun in «Ludelloch».

Cun tge? In «Ludelloch» è ina foppa per plazzar in gutter. Tar l'apparat multifuncziunal museal a Tavau tutga il gutter sco ch'i para tar l'equipament. La bugliotta deriva dal reminent da la segunda mesadad dal 19avel tschientaner e vegniva emplenida cun aua chauda.

Sch'il gutter è original? Qua pon ins specular. Il gutter da vaider porta numnadamain l'inscripziun «Schweppes». La bavronda da soda cun il medem num na vegn'ins probablamain betg ad avair dà als pops. Pia è il gutter original bain vegnì remplazzà insacura.