Ina chaussa seriusa – infantarists da Panaduz davant la camera

Il 1816 ha il construider da vias tessinais Giulio Pocobelli traversà il San Bernardin per planisar ina ruta per ina via da pass. Set onns pli tard è la Via Commerciala cun ina lunghezza da 120 kilometers stada a fin. Ussa pudev'ins viagiar cun la charrotscha en 28 uras da Cuira a Bellinzona.

Quant ditg che Julian Candrian, Toni Bieler e lur camarats da Panaduz han duvrà il matg 1880 per viagiar en il Tessin, na savain nus betg. Segir è: ils infantarists da Panaduz èn vegnids clamads sut las armas pervi da tensiuns en il Tessin.

Ils conservativs e liberals avevan mess ad ir ina battaglia culturala sanguinusa. Il 1876 èsi vegnì a Stabio ad ina sajettada; il process quatter onns pli tard ha procurà en l'entira Svizra per lingias grassas, il militar ha marcà preschientscha. A quest temp regorda ina fotografia da l'Archiv cultural da Panaduz. Julian Candrian, Toni Bieler e ses camarats guardan cun fatschas seriusas en la camera da fotografar. Quai era dentant usità. Da quel temp na surriev'ins anc betg en il studio da fotografar.