Ina veglia manga – ubain quai ch’ins planisava e stirava en Val Müstair

Il Grischun vesess ora tut auter, sch’ins avess realisà tut ils projects da viafier d’antruras: I dess ina viafier da la Greina, ina viafier dal Spleia, ina viafier dal Tödi, ina viafier dal Lucmagn, ina viafier dal Pass dal Set u er ina viafier da l’Engiadina vers l’Orient. Quella dueva manar davent da Cuira en l’Engiadina e tras la Val Müstair fin a Triest e da là schizunt fin en l’India.

Sche la viafier vers l’Orient fiss vegnida construida, tgi sa sche questa «maungua» – che sa chatta oz en Chasa Jaura, il museum regiunal da la Val Müstair – na fiss betg vegnida en funcziun en in «Hotel da la Staziun». Ina «maungua» – il pled jauer per manga – è en tutta cass in cundriz, cun il qual ins po stirar taila e vestgadira a maun da pressiun. La manga exponida en il museum Chasa Jaura a Valchava è bain eleganta, ella è fatga da lain da fau e da lain da ruver, per las chamischas dals giasts d’hotel fiss ella però in zic graschla. La manga che datescha da la segunda mesadad dal 19avel tschientaner è probablamain vegnida duvrada per stirar bindels.

Apropos viafier vers l’Orient: Ina spezia da «Hotel da la Staziun» datti en Val Müstair, nua ch’i na curseschan fin oz nagins trens, per propi: il Münsterhof. Quest hotel è vegnì inaugurà l’onn 1887 cun la speranza che la viafier portia prest dapli giasts en la val. Era sche quai n’è betg capità, vali tuttavia la paina da visitar la Val Müstair, il Münsterhof e la Chasa Jaura.