Chasinas bellas u tastgettas charas? – la chaschina d'eucaristia dal Stgazi da la catedrala da Cuira

Tgi che visita senza enconuschientschas il Museum dal Stgazi da la catedrala da Cuira pudess sa smirvegliar: i dat qua diversas ovras artisticas che sumeglian in pau chasinas. Tar intginas da questas chasinas sa tracti d'uschenumnads reliquiaris; en els vegnan conservadas reliquias ed objects persunals da sontgs. Autras ovras artisticas en furma da chasinas vegnivan duvradas per intents liturgics en il servetsch divin. Ina da quellas è in'ovra tut speziala: ina chascha d'eucaristia carolingica.

La chaschina da lain surtratga cun sturs d'arom surdorà è bundant 20 centimeters lunga, 16 centimeters auta e set centimeters lada. La chaschina è pia propi pitschna. E tuttina mussa quella in'enorma ritgezza: or dals ornaments entretschads abstracts cumparan draguns e columbas, sin la vart davant da la chaschina splenduran perfin pedras preziusas. Pli baud eran quai nov, oz èn quai anc quatter. Sche la chasina fiss fatga da tgirom empè da lain, pudess ins pensar ch'i sa tractia d'ina tastgetta da Dolce & Gabbana.

Vegnida creada è la chaschina, en la quala ins metteva probablamain las hostias, gia en l'otgavel tschientaner. La chascha è unica sco la collecziun dal Museum dal Stgazi da la catedrala: el represchenta la finala l'istorgia d'in dals pli vegls uvestgieus en il nord da las Alps. Bundant 1600 onns ha l'uvestgieu da Cuira – e la collecziun ha perquai in'impurtanza naziunala. En il Museum dal Stgazi da la catedrala pon ins dal reminent era vesair in'ovra da pliras parts ch'è unica en l'entira Svizra: l'uschenumnà ciclus da maletgs da la mort dal 16avel tschientaner.

Fotografia: © Domschatzmuseum Chur, Foto: Stephan Kölliker