Renumà e tuttina nunenconuschent – il Maister da Vuorz

Baininqual artist grischun n’ha betg mo laschà enavos in’ovra impressiunanta, els paran dad esser preschents era sco persunalitads. Per exempel Giovanni Segantini, il grond renovatur da la pictura alpestra, è da vesair sco figura marcanta sin fotos ed autopurtrets; in um grond cun barba ed in’egliada clera quasi penetranta. E tgi che pensa al famus sculptur bregagliot Alberto Giacometti vesa probablamain davant ses egl intern ina fatscha melanconica profundada en patratgs sut ina chavellera ritschada.

Auter èsi tar il Maister da Vuorz. Quest artist ha creà enturn la mesadad dal 14avel tschientaner ovras impressiunantas – en furma da picturas muralas en differentas chapluttas e baselgias dal Grischun dad oz, tranter auter a Razén, Lüen, Casti, Dusch sur Pasqual u Churwalden. Davart sia persuna u sia cumparsa na savain nus prest nagut. Gnanc ses num n’è enconuschent.

Il Maister da Vuorz numn’ins l’artist nunenconuschent pervia dad ina da sias pli impurtantas ovras, in ciclus da la passiun en la baselgia refurmada da Vuorz. Gist visavi la baselgia infurmescha dal rest in museum davart il temp da l’artist e davart sias ovras extraordinarias en stil gotic.