In vitg cun carisma – Roveredo e ses maisters constructurs barocs

Roveredo ha bundant 2600 abitantas ed abitants. Il vitg en il Mesauc na vala perquai betg gist sco cosmopolitic. Ma dal punct da vista istoric è il carisma da Roveredo enorm. Quai ha per exempel da far cun la famiglia Zuccalli.

Enrico Zuccalli (ca. 1642–1724) è stà durant blers onns maister constructur da la curt bavaraisa e vala sco represchentant principal da l'uschenumnà autbaroc da Minca. El e ses parents han realisà numerus edifizis en la Germania dal Sid. Ed ils Zuccallis n'eran tuttavia betg ils singuls maisters constructurs e stuccaturs da Roveredo che han laschà enavos fastizs a l'exteriur. Quai sa mussa per exempel en il Museo Moesano a San Vittore. Il museum preschenta a moda detagliada l'istorgia e las ovras dals maisters constructurs dal Mesauc.

Fastizs han laschà enavos ils maisters constructurs e stuccaturs da Roveredo er en lur vitg natal. In grond palazi ha construì qua per exempel il maister constructur Tommaso Comacio. E gist dasperas, en la baselgia da San Giulio, dispona ina chaplutta laterala d'in fantastic palantschieu sura da stuccatura, creà l'onn 1641 da Giovanni Battista Zuccalli, il bab dad Enrico Zuccalli.