Innovativ e tort – in maletg da San Murezzan

San Murezzan? Tgi na pensa qua betg als giasts bels e ritgs ch’alloscheschan en il «Badrutt’s Palace» illuster? Ubain a las regattas a vela che han lieu la stad sin il Lai da San Murezzan? Forsa er al turnier da polo che vegn organisà d’enviern sin il glatsch dal lai?

Ina carta postala or da l’inventari dal Museum retic mussa anc dapli – numnadamain la veritabla tgina dal turissem d’enviern a San Murezzan. La cartulina illustrescha il «Kulm» dal piunier da hotels legendar Johannes Badrutt. Quel duai avair mess patg il 1864 cun ses giasts da stad englais che l’enviern a San Murezzan als plaschess. El ha gudagnà la scumessa, il turissem d’enviern è s’etablì – ed il «Kulm» è daventà il hotspot da l’istorgia d’hotels e da sport. En quest hotel è vegnida envidada l’onn 1879 l’emprima glisch electrica da la Svizra. Ed il parc da l’hotel cun sias pistas da glatsch e da curling è stà il 1928 ed il 1948 il center dals gieus olimpics d’enviern.

Quella u quel che pensa ussa ch’insatge na saja betg propi reussì cun far la carta postala dal 1919 po sa quietar: il clutger da vart dretga è davaira tort. Gia il 19avel tschientaner è la tur da l’anteriura baselgia da sontg Murezi s’inclinada vers la val. Quella tendenza ha cuntinuà, uschia che la tur-baselgia vala oz cun in angul d’inclinaziun da 5,5 grads sco ina da las turs las pli tortas dal mund.