Terrester ed etern – la mascra da mort da Friedrich Nietzsche

El vegn mudregià dal mal il tgau, sia vesida è gia bunamain svanida e sia lavur sco professer da filosofia ha Friedrich Nietzsche gia dà si. Uss arriva el cun 36 onns en l'Engiadina. La vallada alpina dal Grischun – ed en spezial Segl-Maria – daventa per el in spazi per sa revegnir e s'inspirar. Qua ha Friedrich Nietzsche scrit ovras impurtantas, qua sa senta el «lunschora il meglier sin quest mund».

Ditg na resta Friedrich Nietzsche betg sin quest mund. Il 1900, cun mo 55 onns, mora el en stgirament dal spiert. Ina mascra da mort duai mantegnair ils ultims tratgs da sia fatscha. Ella vegn lura retuschada – ed arriva il 1960 a Segl-Maria.

Qua en l'anteriura Chasa Durisch ha Friedrich Nietzsche passentà set stads. Or da la chasa da purs è daventà gia daditg in museum ed in lieu da perscrutaziun davart la vita e l'ovra da Nietzsche. La chombretta, en la quala Nietzsche abitava, exista anc adina en tut sia simpladad. E la mascra da mort è era da vesair qua.