Las mastergnanzas da Cuira – u tgi che cumonda las festas a Cuira

Durant tschientaners circumdeschan in mir ed in foss la citad da Cuira. Ma l'entschatta dal 19avel tschientaner va il mir pli e pli en muschna ed il 1828 vegn il foss emplenì. I nascha ina nova via che vegn emplantada d'omaduas varts cun trembels.

Las mastergnanzas venerablas da Cuira recurran «cunter l'emplantar aleas senza senn», ma empè dals trembels e da la Grabenstrasse ston bainbaud guntgir las mastergnanzas. Il 1840 vegnan ellas numnadamain eliminadas a favur da la libertad da professiun.

Per bun quatter tschientaners han las mastergnanzas furmà la pli impurtanta forza politica a Cuira. Quant gronda che la pussanza da las tschintg associaziuns da mastergnants era, mussa in formular dal 1751 che vegn conservà en il Museum retic. Il formular mussa sura la vopna da la citad che vegn circumdada da las vopnas da las tschintg mastergnanzas. In plaz per lavurers esters u autras forzas politicas na datti qua betg. Ma almain quai: Cun quest formular daventa Steffen Schmiedt da Favugn in «Hintersäss», in fulaster. E quai munta: L'um da Favugn survegn ina sort permissiun da domicil a Cuira.