In plan cun allusiuns? – ina mesiraziun da cataster da la chasa da cura Tarasp

La chasa da cura Tarasp stenda enavant sias duas alas lateralas sco bratscha. En vista a la lunga e commoventa istorgia da la chasa da cura pudess ins specular, tge ch’il moviment pudess muntar: vul la chasa da cura anc ina giada embratschar il curtin neobaroc a ses temp uschè magnific? U tschertga la chasa da cura agid?

Cler è: la chasa da cura avra sias portas il 1864, è bain pumpusa, ma la situaziun finanziala è adina puspè problematica. Oz vegn la chasa da cura manada sco hotel sut il num Scuol Palace. Restà è il lieu magic dasper l’En. En il decurs dal temp è dentant era sa midà bler.

Quai mussa en spezial in plan, in’uschenumnada mesiraziun da cataster che vegn conservada en l’Archiv dal stadi dal chantun Grischun. Il plan dal 1898 mussa ina construcziun cun l’inscripziun «chaldera da lavar e chaldera a vapur». Il 1913 ha quest edifizi fatg plazza ad ina chasa per far bogn. Sa midada è dentant era quella: oz na serva la chasa per far bogn betg pli al far cura, mabain a l’art ed a la cultura. L’anteriura chasa per far bogn è la sedia da la Fundaziun Nairs.