Da vitg a vitg – en gir cun la «mola»

«Im Höuwmonatt gieng ich über den Sättmer (Septimer), Julier, Albelen (Albula), über die grössten bärge, bi groser Hiz, schwer tragen und gar wenig gält im seckl.» Quai scriva il pictur ambulant Hans Ardüser – sia ortografia è magari libra – davart sias experientschas dal fanadur 1590. Ma sias turas da quella stad al han purtà paucas incumbensas e paucs raps.

Hans Ardüser n'era betg in cas singul. Durant tschientaners èn las Grischunas ed ils Grischuns emigrads per chattar ina nova existenza – sco pastizieras, stuccaturs, mercenarias u vendiders da rascha. Durant tschientaners èn dentant era viagiads umans tras las vals grischunas e las regiuns cunfinantas – sco chalderers, scharlatans, picturs ambulants u mulets.

Quant dira che la lavur dals mulets era, mussa il Museo Poschiavino. Qua è exponida ina «mola», in vehichel da lain cun ina mola integrada e blers ulteriurs utensils. Cun quels apparats viagiavan ils mulets anc en il 20avel tschientaner da vitg a vitg per porscher lur servetschs.