Il geolog cun la camera – Moritz Blumenthal

1872 è vegnì avert a Cuira in museum che n’è oz strusch pli imaginabel en questa furma. Il «Museum grischun per economia e cultura» ha dà albiert ad objects istorics e da la scienza natirala, latiers a numerusas ovras d’art ed era cudeschs. En pauc temp era il museum pli che mo plain e memia voluminus per la Chasa Buol, il Museum retic d’oz.

Malgrà ch’ins ha spustà effectivs – tranter auter en la Villa Planta che furma oz la part istorica dal Museum d’art dal Grischun – è la mancanza da spazi per la collecziun da la scienza natirala restada actuala per bunamain in tschientaner. Dal 1967 ha relaschà in geolog grischun in legat per la construcziun nova d’in museum da la natira. L’onn 1981 è vegnì inaugurà quest edifizi nov – il Museum da la natira dal Grischun. Ma tgi era quest geolog?

Moritz Blumenthal è naschì dal 1886 a Cuira, ha frequentà la scola chantunala, studegià geologia a Vienna e Turitg, è suenter ì per il mund enturn – tranter auter sco geolog da petroli en il servetsch dal concern da Shell odiern. Adina cun el: ses apparat da fotografar. Bunamain 4800 fotografias da Blumenthal – d’ina vart purtrets da lieus geologicamain interessants, da l’autra vart fotos da citads, umans u edifizis – sa chattan oz en l’Archiv chantunal dal Grischun, e quai er en furma digitala.