Ina chaussa seriusa: nudar nursas

In pitschen rudè sco chau, in grond rudè sco corp, vitiers quatter stritgs sco chommas – e gia dissegnada ina nursa.

Sut «nudar nursas» chapeschan ils purs dentant insatge auter. Ils purs nodan lur animals, per che per exempel ils pasturs sappian la fin da la stad d'alp a tgi ch'els ston returnar ils animals. Per il solit passentan animals da differents possessurs ensemen la stad sin in'alp. Mintgatant èn quai plirs tschients tocs.

Oz survegnan ils animals per regla marcas d'ureglia. Pli baud eri usit da tagliar plirs cugns en las ureglias dals animals. En il circul da Tavau mettev'ins anc enturn il 1870 ina sort da penderliez vi da las ureglias. Quai mussa ina collecziun da marcaziuns da nursas en il Museum local da Tavau. Sin questas èn visiblas las letras u ils buls cun la vopna dals possessurs. Tenor vegl usit vegnivan las nodas da las nursas dadas dal bab vinavant al figl giuven, e sch'i na deva betg in tal – a la figlia giuvna.