Onomatopoetic e pratic – il «firliforli» u «Schüsslaborrer»

Ils tschentapignas e chalderers utilisavan el per lur lavur – e la clientella sa legrava, sch'il «firliforli» adempliva ses intent. Cun il term sursilvan firliforli è manegià in tarader a spirala. Cun quest utensil furavan ils tschentapignas e chalderers rusnas en cuppas ruttas u en autra vaschella.

Pertge che quai legrava la clientella? Fitg simpel: ils tschentapignas e chalderers duvravan las rusnas per fixar parts da la vaschella rutta cun agid da fermagls da fildarom. Pinar la vaschella rutta era la finala pli bunmartgà che da cumprar novas cuppas u crias.

In «firliforli» è per exempel exponì en il Museum regiunal Gandahus a Val. Ils Gualsers numnan il tarader a spirala «Schüsslaborrer» ubain «Häftliborrer». E co ch'ina cuppa cun «Häftli» respectivamain fermagls da fildarom vesa ora, quai pon ins medemamain contemplar en il Gandahus.