Per la societad bainstanta – il salun en il Palazzo Castelmur
La stiva bella? Quella enconuschain nus da las chasas veglias engiadinaisas: là è la «stüva» tavlegiada tradiziunalmain cun lain da schember. Ina parenta ha questa «stüva» en la Bregaglia: era qua è la «stüa» il lieu il pli famigliar ed empernaivel da la chasa.
En la Bregaglia na datti dentant betg be stivas da schember, qua spetga er in salun magnific sin las egliadas dals admiraturs. E quest salun sa chatta en ina sort chastè da pastiziers; en il Palazzo Castelmur dasper Stampa, che fa endament edifizis venezians imposants. Construì il palaz ha propi in pastizier: Giovanni de Castelmur che possedeva – sco gia ses bab – ina pastizaria a Marsiglia ed è daventà pulit bainstant. Il Palazzo mussa questa ritgezza ed il medem mument quant enragischada che la famiglia era en la Bregaglia. En il palaz neogotic da la mesadad dal 19avel tschientaner è integrada ina chasa patriziana dal 1723. Vers sid sa mussa pia in chastè neogotic cun ina curnisch dentada platta e vers nord ina chasa imposanta plitost tipica per il lieu cun in tetg a duas alas.
Anc pli spectacular è l'intern: las stanzas èn cuvridas cun picturas dal palantschieu sura, tapetas e mobiglias magnificas en il stil da rococo e Biedermeier. Il salun para da spetgar sin la societad bainstanta. In zic pli simplas sa preschentan las stanzas en il bajetg vegl: qua dominescha il lain, sco en las bellas stivas veglias.
Fotografia: © Andrea Badrutt