E nua è la «pitschna cotschna»? In placat da la viafier dad Augusto Giacometti

«Qui riposa il maestro dei colori» stat scrit sin il crap da fossa da l'artist Bregagliot Augusto Giacometti (1877-1947). In maister da las colurs è el stà per propi: en intginas ovras paran pir las colurs da dar furma a las chaussas, en autras ovras paran las colurs dad esser libras, ma adina èn ellas armonicas.

Cun furmas concretas e surfatschas coluradas a moda clera sa preschenta in placat da Giacometti da l'onn 1918. Quel mussa in parasol cotschen, avert sur la cuntrada muntagnarda da l'Engiadin'Ota. Quest placat è vegnì duvrà pliras giadas: el ha fatg reclama per il Grischun e perla Viafier retica cun la scripziun «Viva la Grischa» u cun «Sonnenland». La scursaniziun tudestga «Rh.B.» è da vesair en questa varianta sura a sanestra. La Viafier retica, che vegn numnada qua en il Grischun amuraivlamain la «pitschna cotschna», manca dentant sin tut las variantas dal placat.

Far reclama per la viafier senza mussar la viafier? Augusto Giacometti n'è betg stà il sulet che ha gì questa idea. Er autras artistas ed auters artists èn sa servids da motivs che n'han betg mussà la viafier, mabain che han mussà la destinaziun dal viadi. Ed oz irritass il tren sin il maletg probablamain: la «pitschna cotschna» era anc verda da quel temp enturn il 1918. Cotschens èn ils vaguns vegnids pir decennis pli tard.